Италийн Сери А лигийн 23-р тойргийн тоглолтууд өнгөрсөн амралтын өдрүүдэд явагдлаа. Ювегийн тааруухан форм энэ тойрогт ч үргэлжилж Ливорногийн талбайгаас ялалт авч чадсангүй. Тооны харьцаа 1 : 1 байсан эгзэгтэй үед Фелипе Мело 2 дахь шар хуудсаа хүртэж багаа хүнд байдалд оруулсан юм. 2 онооноос гадна Юве гол хамгаалагч Фабио Каннаварогоо гэмтлийн эмнэлэг рүү үдчихлээ. 51 дэх минутад Канна бэртэл авч Зебинагаар сэлгэгдсэн юм. Ювегийн энэ бүдрэлтийг ашиглан Палермо, Сампдория багууд байр урагшиллаа. Ганцхан сарын өмнө эхний 4-р байранд бичигдэж байсан Юве одоо 7-р байр хүртэл ухарч Европын тэмцээний эрхтэй үлдэх үү, үгүй юу гэж яригдах болоод байна.  АС Милан энэ тойрогт Болоньягийн талбайд зочилж нэг оноотой харилаа. Ийнхүү тэд сүүлийн 4 тоглолтоос ялалт авч чадсангүй. Интерээс зээлээр ирсэн Мансини гараад гарч тоглосон бөгөөд Леонардо Бексийг  сэлгээнд суулгаж 2-р хагасын дундуур талбайд гаргасан юм.
Эзэн багийн хаалгач Роберто Коломбо тоглолтын гол баатраар тодорсон бөгөөд Миланчуудын олон аюултай довтолгоог зогсоожээ.
Гол өрсөлдөгчид нь ийнхүү оноо алдаж байхад Интер Кальяриг 3 : 0-ээр бутниргэж ядах юмгүй 3 оноогоо авлаа. Торгуультай байгаа Шнайдерийн оронд Горан Пандев довтолгооны хагасаар тоглосон бөгөөд Самуель Это’о, Милито хүчирхэг хослолоор Моуриньо урд эгнээгээ бүрдүүлсэн байв. Это’о Африкийн цомоос эргэж ирснээсээ хойш анх удаа гараанд багтаж байгаа нь энэ юм. Горан Пандевийн шилдэг тоглолт Интерийн ялалтын гол үндэс болсон бөгөөд 6 дахь минутад Македон эр тооны харьцааг нээж Интерийн төлөө 3 дахь гоолоо орууллаа. Үлдсэн гоолуудыг Нерразуррид Валтер Самуель, Диего Милито нар 20, 47 дахь минутад авчирсан юм.
Энэ тойргийн сүүлийн тоглолт Фиорентина – Рома багуудын хооронд явагдлаа. Пранделлигийн хөвгүүд талбай дээрээ ялалт авахын тулд боломжтой бүхнийг хийсэн ч Жулио Серхио хэмээх хана хэрмийг давж чадалгүй байсаар ялагдлаа.  Жоветич, Монтоливо, Варгас нарын цөөнгүй аюултай довтолгоог Серхио эцсийн мөчид хааж багаа ялагдахаас аварсан тул тоглолтын шилдгээр зүй ёсоор нэрлэгдсэн юм. Фиорентинагийн ашиглаж чадаагүй боломжуудын хариу болгож 82  дахь минутад Мексесийн дамжуулалтаар Вучинич цорын ганц хожлын гоолыг Ромад бэлэглэсэн юм. Рома энэ ялалтыг авсанаар 2-р байр луу дэвшлээ. Одоо хүснэгтийг тэргүүлэгч Интерээс тэд 8 оноогоор тусгаарлагдаж байгаа юм. Клаудио Раньери ялалтынхаа дараа ”Фиорентина бидний эсрэг маш хүчтэй эсэргүүцэл үзүүллээ. Эцэст нь бага зэргийн аз манайд 3 оноо авахад тус болсон. Яг одоо биднийг Интертэй аваргын төлөө тэмцэх хамгийн боломжтой баг гэж бичиж байна. Гэхдээ тэдний хүч одоохондоо дэндүү их байгаа учраас би ямар нэгэн том амлалт өгмөөргүй байна”
Сери А-гийн мэргэн буучдыг 16 гоолтой Ди Натале тэргүүлж байгаа бол 2 гоолын зөрүүтэй Д.Милито удаалах ажээ.