Монгол Улсын Мянганы хөгжлийн зорилтод суурилсан Үндэсний хөгжлийн цогц бодлогын хэрэгжилтэд эхний шатны үнэлгээ хийх төлөвлөгөө батлах тухай Засгийн газрын тогтоолыг “Төрийн мэдээлэл” эмхтгэлийн шинэ дугаарт  нийтэлжээ.

Төлөвлөгөөнд Хөгжлийн тэргүүлэх чиглэл, стратегийн зорилтуудын хүрээнд хэрэгжүүлэх арга хэмжээг нарийвчлан тусгасан байна.

Тухайлбал, ядуурал, ажилгүйдлийг бууруулах бодлогын хүрээнд хүн амын орлогын өсөлтийг хангах замаар ядуурлыг хоёр дахин бууруулахаар төлөвлөөд байгаа юм.

Хэрэгжилтийн эхний шат буюу 2015 онд ядуурлын түвшинг 18 хувь, 2021 онд 5 хувь хүртэл, ажилгүйдлийн түвшинг 2021 онд 3 хувь хүртэл бууруулахаар төлөвлөжээ.

Амьжиргааны түвшин нь дээшилсэн айл, өрхийн тоо 2015 онд 100.000 хүрсэн байх бол 2021 онд 150.000 болсон байх юм байна.

Үүнээс гадна гэр бүлийн хөгжил, хүн ам зүйн бодлого, боловсрол, соёл урлаг, шинжлэх ухаан, технологи, нийгмийн хамгаалал, хөдөлмөр, эдийн засгийн бодит салбаруудын хүрээнд дэвшүүлсэн олон зорилт, арга хэмжээг хэрэгжүүлснээр 2015, 2021 онд хүрэх үр дүнг тодорхой тусгасан байна.