Долгион – Од компаний барилга дээр 2 сар ажилласан ч хөлсөө авч чадахгүй байна хэмээсэн  хэсэг иргэд бидэнд хандсан юм. Учрыг тодруулахад Долгион –Од компанийг ч барилгын ажилчдыг ч тэр гуравдагч этгээд хохироосон байсан юм. Сургамж болгох үүднээс энэхүү мэдээллийг хүргэж байна. Энд зогсож байгаа ажилчид нийт 20 гаруй хүн 5р сарын 26-наас эхэлж Долгион-Од компанийн Чингэлтэй дүүргийн 7 буудлын эцэст байрлах барилга дээр ажиллажээ. 2 сар гаруй энэ хүмүүс барилга дээр ажилласан ч хийсэн ажлынхаа хөлсийг авч чадаагүй өдийг хүрчээ. Ажлын хөлсөө авахыг хүсэхэд өөрийгөө Долгион-Од компанийн гүйцэтгэх захирал гэж танилцуулсан Батболд гэгч 2 сая төгрөг өгнө гэж гарын үсэг бүхий бичиг хийж өгсөн ч өдийг хүртэл чулуу хөөлгөсөөр иржээ. Долгион –Од компаниас энэ талаар тодруулахад эдгээр ажилчдын цалин хөлсөө авч чадахгүй байгаа нь тус компанитай холбоогүй. Компаний зүгээс туслан гүйцэтгэгч шалгаруулж ажиллуулсан. Харин туслан гүйцэтгэлийг удирдаж байсан Батболд гэх хүнд ажлын гүйцэтгэл 100 хувь дуусаагүй байхад 6 сая гаруй төгрөг өгсөн гэж тайлбарлаж баримтыг үзүүллээ. Бас Батболд нь Долгион од компаний гүйцэтгэх захирал биш гэж хэлж байна.  Долгион-Од компаний зүгээс компаний үйл ажиллагаанд хохирол учруулж, нэр хүндийг унагасан Батболд гэгчийг хууль хяналтын байгууллагаар шалгуулна гэж мэдэгдэж байгаа бол энэ компаний барьж байгаа барилга дээр ажилласан ажилчид цалин хөлсөө Батболд гэгчид залилуулаад хоцорч байна. Ажилдчийн хувьд шүүхээр явы гэхэд нэхэмжлэхийн мөнгө ч төлөхгүй чадваргүй , бас хугацаа их орох учраас яаралтай цалингаа олж авахын тулд хэнд хандахаа мэдэхээ болиод байна. Ер нь сүүлийн үед иймэрхүү маргаан их гарч, энгийн иргэд хохирч үлдэх тохиолдол гарсаар байна.